कोहलपुर – भदौ २, २०८२
सञ्चारिका समूह बाँके शाखाले पहिलोपटक आयोजना गरेको महिला पत्रकारहरूको विशेष ‘तिज ट्यालेन्ट शो–२०८२’ आइतबार कोहलपुरमा सम्पन्न भएको छ। कार्यक्रममा महिला पत्रकारहरूले गायन, नृत्य र साहित्य विधामा आफ्नो कला र प्रतिभा प्रस्तुत गरेका थिए।
कार्यक्रमकी प्रमुख अतिथि कोहलपुर नगरपालिकाकी कार्यबहाक नगरप्रमुख सङ्गिता सुवेदीले महिला पत्रकारहरू लेखनमै सीमित हुनु पर्ने परम्परा तोड्दै आफ्नै प्रतिभा प्रदर्शन गर्ने अवसर कार्यक्रमले दिएको बताउनुभयो।
विशिष्ट अतिथि लखनउ सिटी अस्पतालका डा. प्रमोद कुमार पालले तिजलाई महिलाको हर्ष–उल्लास र संस्कृतिको पर्वका रूपमा उल्लेख गर्दै यसको स्वास्थ्य, सामाजिक र सांस्कृतिक महत्वबारे प्रकाश पार्नुभयो।
नेपाल पत्रकार महासङ्घ बाँके अध्यक्ष नवीन गिरी, उपाध्यक्ष करुणा शाह, सञ्चारिका समूह लुम्बिनी प्रदेश उपाध्यक्ष रुपा गहतराज, संस्थापक अध्यक्ष अछरी पोख्रेल, वडा अध्यक्ष हरि कठायत र समाजसेवी अन्जना पाण्डेलगायतले पनि कार्यक्रमलाई महिलाको सिर्जनशीलता, सामूहिकता र सशक्तीकरणसँग जोडिएको पहलका रूपमा मूल्याङ्कन गर्नुभयो।
विजेताहरू
प्रतियोगितामा तीन विधामा प्रतिस्पर्धा भएको थियो।
एकल गायनतर्फ : प्रथम – शान्ती सुनार, द्वितीय – काजल रैका, तृतीय – विमला चौधरी
साहित्यतर्फ : प्रथम – निशु जोशी, द्वितीय – विद्युत्मा रैका, तृतीय – शान्ति सुनार
नृत्यतर्फ : प्रथम – ममता थापा, द्वितीय – ज्ञानु थापा, तृतीय – सन्ध्या गरै र सावित्री गिरी
तीनै विधाका प्रथम विजेतालाई पोखरा गहना पसलका सञ्चालक बालकृष्ण दियालीले नगद पुरस्कारसहित चाँदीको सिक्का उपहार प्रदान गर्नुभयो।
कार्यक्रमको अध्यक्षता सञ्चारिका समूह बाँके अध्यक्ष पवित्रा परियारले गर्नुभएको थियो भने स्वागत मन्तव्य उपाध्यक्ष सरला सुवेदीले गर्नुभएको थियो। कार्यक्रमको सञ्चालन ममता थापा र धना केसिले गर्नुभएको हो।
