कोहलपुर नगर स्तरीय युवा क्लब सञ्जालको आयोजनामा “लुम्बिनी युवा सम्मेलन एवं युथ फेस्टिभल २०८१” फागुन १५, १६, र १७ गते कोहलपुर नगरपालिकाको वडा नम्बर ११, न्यूरोड खुल्ला मञ्चमा आयोजना हुँदैछ।
युवाको सशक्तिकरणमा योगदान
“हाम्रो आत्मशक्ति, हाम्रो मनमा उमङ्ग; अबका युवाले ल्याउनेछन् परिवर्तनको रङ्ग” भन्ने नाराका साथ आयोजना हुन लागेको यो सम्मेलनले युवा सशक्तिकरण, नेतृत्व विकास, उद्यमशीलता प्रवर्द्धन, कला, संस्कृति, र मनोरञ्जनात्मक गतिविधिहरूलाई प्रमुख रूपमा स्थान दिनेछ।
कार्यक्रममा विभिन्न प्रेरणादायी वक्ताहरू, समाजसेवी, तथा सफल उद्यमीहरू सहभागी हुनेछन्, जसले युवाहरूलाई मार्गदर्शन प्रदान गर्नेछन्। साथै, स्थानीय सांस्कृतिक झलक प्रस्तुत गर्ने नृत्य, सङ्गीत, तथा विविध प्रतियोगिताहरूको समेत आयोजना गरिनेछ।
यस फेस्टिभलमा कोहलपुर तथा वरपरका क्षेत्रका हजारौँ युवाहरूको सहभागिता रहने अपेक्षा गरिएको छ। कार्यक्रम संयोजक रोशन वरका अनुसार, यो सम्मेलन युवाहरूलाई आफ्नो क्षमता उजागर गर्ने महत्वपूर्ण अवसर प्रदान गर्नेछ।
कार्यक्रमको संरक्षक कोहलपुर नगरपालिका बाँके रहेको छ। आयोजक संस्थाले सबै युवाहरू, सामाजिक अभियन्ताहरू, तथा स्थानीय बासिन्दाहरूलाई सहभागिताका लागि हार्दिक निमन्त्रणा गरेको छ।
