कोहलपुर । एभरेस्ट सैनिक माध्यमिक विद्यालय, कोहलपुरमा कक्षा १२ का विद्यार्थीहरूले कक्षा ११ मा भर्ना भएका नयाँ विद्यार्थीहरूलाई भव्य रूपमा स्वागत गरेका छन्। कोहलपुर–१२ स्थित सुनाखरी होटलमा आयोजित स्वागत कार्यक्रममा विद्यार्थीहरूको उत्साह, सांस्कृतिक प्रस्तुति र शिक्षासम्बन्धी प्रेरणादायी मन्तव्यले कार्यक्रमलाई विशेष बनाएको थियो।
कक्षा १२ का विद्यार्थीहरूको आयोजनामा सम्पन्न कार्यक्रमको अध्यक्षता दीपक रोकायाले गरेका थिए। कार्यक्रममा विद्यालय सञ्चालक समितिका अध्यक्ष तथा प्रमुख अतिथि टोपेन्द्रबहादुर केसी, एभरेस्ट सैनिक माविका एमडी महेन्द्र शर्मा, विद्यालय व्यवस्थापन समितिका अध्यक्ष कृष्ण भुसाल, प्रशासन प्रमुख तुल्सी तिमिल्सिनालगायत शिक्षक, पत्रकार र विद्यार्थीहरूको उपस्थिति रहेको थियो।
कार्यक्रमको उद्घाटन प्रमुख अतिथि टोपेन्द्रबहादुर केसीले पानसमा बत्ती प्रज्वलन गरेर गरेका थिए। कक्षा १२ की विद्यार्थी खुसी थापाले स्वागत मन्तव्य व्यक्त गर्दै नयाँ विद्यार्थीहरूलाई विद्यालय परिवारमा आत्मीय स्वागत गरेकी थिइन्।
कार्यक्रममा विभिन्न नृत्य, गजल तथा गायनसहितका सांस्कृतिक प्रस्तुतिहरू प्रस्तुत गरिएका थिए। विद्यार्थीहरूको प्रतिभा र सिर्जनात्मक प्रस्तुतिले स्वागत समारोहलाई थप आकर्षक बनाएको थियो।
कार्यक्रममा मन्तव्य राख्दै एभरेस्ट सैनिक माविका एमडी महेन्द्र शर्माले विद्यालयले विद्यार्थीहरूको शैक्षिक विकाससँगै अनुशासन, व्यवहारिक ज्ञान र अतिरिक्त क्रियाकलापलाई प्राथमिकता दिँदै आएको बताए। उनले कक्षा ११ मा प्रवेश गरेका विद्यार्थीहरूलाई नियमित अध्ययन, मेहनत र सकारात्मक सोचका साथ अघि बढ्न प्रेरित गरेका थिए।
त्यसैगरी विद्यालय व्यवस्थापन समितिका अध्यक्ष कृष्ण भुसालले विद्यार्थी जीवनमा अनुशासन, संस्कार र शिक्षाको महत्त्वबारे धारणा राख्दै नयाँ विद्यार्थीहरूलाई विद्यालयको वातावरणमा घुलमिल भएर आफ्नो प्रतिभा विकास गर्न आग्रह गरेका थिए। उनले विद्यालयको शैक्षिक गुणस्तर कायम राख्न शिक्षक, विद्यार्थी र अभिभावकबीचको सहकार्य आवश्यक रहेको उल्लेख गरेका थिए।
प्रमुख अतिथि तथा विद्यालय सञ्चालक समितिका अध्यक्ष टोपेन्द्रबहादुर केसीले विद्यार्थीहरूलाई आफ्नो लक्ष्यप्रति केन्द्रित हुँदै इमानदारी, लगनशीलता र अनुशासनका साथ अध्ययन गर्न सुझाव दिएका थिए। उनले विद्यालयले विद्यार्थीहरूको उज्ज्वल भविष्य निर्माणमा शिक्षासँगै नैतिक मूल्य, संस्कार र व्यक्तित्व विकासलाई समेत महत्त्व दिनुपर्ने धारणा व्यक्त गरेका थिए।
प्रशासन प्रमुख तुल्सी तिमिल्सिनालगायत शिक्षकहरूले पनि नयाँ विद्यार्थीहरूलाई विद्यालयको नियम, अनुशासन र अध्ययनप्रतिको जिम्मेवारीबारे मार्गदर्शन गरेका थिए। वक्ताहरूले विद्यार्थीहरूलाई समयको सदुपयोग गर्दै शैक्षिक तथा अतिरिक्त गतिविधिमा सक्रिय सहभागिता जनाउन आग्रह गरेका थिए।
