कोहलपुर, शक्तिनगर – फुलबारी एजुकेसनल एकेडेमी, शक्तिनगरले आफ्नो १०औं स्थापना दिवसको अवसरमा बृहत सरसफाइ अभियान सम्पन्न गरेको छ। विद्यालय परिसर तथा आसपासका क्षेत्रलाई सफा राख्ने उद्देश्यले आयोजना गरिएको कार्यक्रममा विद्यार्थी, शिक्षक, प्रहरी र नगरप्रहरीको सक्रिय सहभागिता रहेको थियो।
विद्यालयका प्रधानाध्यापकका अनुसार यो अभियानले विद्यार्थीहरूमा स्वच्छता तथा सामाजिक उत्तरदायित्वप्रति जागरूकता बढाउने लक्ष्य राखेको छ। कार्यक्रममा सहभागीहरूले सफाइ अभियानलाई निरन्तरता दिनुपर्ने भन्दै सरसफाइको महत्वबारे चेतनामूलक सन्देश प्रवाह गरेका थिए।
स्थानीय समुदायले पनि विद्यालयको यो प्रयासको प्रशंसा गर्दै यस्ता अभियानले शहरलाई सफा, स्वस्थ र बस्नयोग्य बनाउन सहयोग पुर्याउने विश्वास व्यक्त गरेका छन्। विद्यालय प्रशासनले आगामी दिनमा पनि यस्ता सामाजिक कार्यलाई निरन्तरता दिने प्रतिबद्धता जनाएको छ।
