कोहलपुर, साउन १६ – कोहलपुर कलेज अफ होटल म्यानेजमेन्टको आयोजनामा शुक्रबार “कलेज कुकिङ कम्पिटिसन २०८२” भव्य रूपमा सम्पन्न भयो। प्रतियोगितामा आठवटा टिमबाट १६ जना विद्यार्थी सहभागी थिए, जसले पाककला मार्फत आफ्नो प्रतिभा र सिर्जनात्मकता प्रस्तुत गरे।
कार्यक्रमको प्रारम्भमा गोला प्रथामार्फत हरेक टिमले आफूले पकाउने डिस (कुजिन) चयन गरे। त्यसपछि, ४५ मिनेटको समयसीमाभित्र टिमहरूले आ–आफ्नो परिकार तयार पारेर निर्णायकहरूसमक्ष प्रस्तुत गरे। प्रतियोगिता भित्र नै विभिन्न राष्ट्रिय तथा अन्तर्राष्ट्रिय स्तरका स्वाद, प्रस्तुती र सजावट देख्न पाइयो, जसले प्रतिस्पर्धालाई अझै रोचक बनायो।
प्रतिस्पर्धाको मूल्याङ्कन होटल सेन्ट्रल प्लाजाका सेफ र ट्री टप हेभनका सेफहरूले गरेका थिए। उनीहरूले प्रतियोगी विद्यार्थीहरूको खाना स्वाद, प्रस्तुतीकरण, पोषण, मौलिकता, समय व्यवस्थापन आदि विविध पक्षमा गहिरो रूपमा मूल्याङ्कन मात्र गरेनन्, आफ्नो अनुभवका आधारमा अमूल्य सुझाव र व्यावसायिक टिप्ससमेत दिएका थिए।
सेफहरूले आफ्नो कार्यक्षेत्रमा सिकेका व्यावहारिक ज्ञान, ग्राहकको मन जित्ने तरिका, स्वाद र पोषणको सन्तुलन जस्ता महत्वपूर्ण विषयमा विद्यार्थीहरूसँग खुला संवाद गर्दै उनीहरूलाई अझै आत्मविश्वासी र प्राविधिक रूपमा सक्षम बन्न प्रेरित गरे। प्रतिस्पर्धा विद्यार्थीहरूका लागि मात्र होइन, सेफहरूसँग प्रत्यक्ष अन्तरक्रिया हुने सुनौलो अवसर पनि बन्यो।
कार्यक्रममा मिडियाकर्मी बिकल भट्टराई, हिमान्सु शाही र टार्जन ओलीको विशेष उपस्थिति रहेको थियो, जसले प्रतियोगिता हेरेर विद्यार्थीहरूको कला र मेहनतको सराहना गरे।
प्रतियोगितामा उत्कृष्ट प्रस्तुती दिने टिमलाई कलेजले नगद पुरस्कार प्रदान गर्ने व्यवस्था गरेको छ —
प्रथम: रू. १५००
द्वितीय: रू. १०००
तृतीय: रू. ५००
कलेजका सञ्चालक निराजन आचार्यले विद्यार्थीहरूलाई व्यवहारिक ज्ञान, आत्मविश्वास र उद्योगसँग प्रत्यक्ष सम्पर्क दिने उद्देश्यले यस्ता कार्यक्रम निरन्तर आयोजना गरिने बताए।
प्रतिस्पर्धा सकिएसँगै सहभागी विद्यार्थीहरूले पनि यस्तो कार्यक्रमले आफूहरूलाई सिक्न, प्रयोग गर्न र आफ्नो क्षमता प्रदर्शन गर्न निकै उपयोगी भएको प्रतिक्रिया दिएका थिए।
यस किसिमका कार्यक्रमले युवा पुस्तालाई आत्मनिर्भर बनाउँदै नेपालमै रोजगारी र उद्यमशीलताको सम्भावना झनै उजागर गर्ने देखिन्छ।
